Gipuzkoako Merkataritza Enpresa 2016 - Gipuzkoako Bazkundea

Urolako merkataritza-bulegoek eta Gipuzkoako Bazkundeak Kimu Bat saritu dute

  • Azpeitian kokatutako paisajismo enpresak ’10 bitxiak’ saria jaso zuen bart gauean, beste bederatzi erakunderekin batera -eskualde bakoitzeko bana-, balio azpimarragarriak transmititzen dituztelako eta ospea dutelako

  • Markel Olano ahaldun nagusiaren presentziarekin burututako ekitaldian, 2016ko Gipuzkoako Merkataritza Enpresaren Saria eskuratu zuen Croqueta y Presumida-k

 
Kimu Bat saritua izan zen, Gipuzkoako beste hamar enpresarekin batera, XXIV. Gipuzkoako Merkataritza Enpresaren sari-banaketan, bart gauean, azaroak 25, Gipuzkoako Bazkundean. Gipuzkoar erakundeak elkarlanean jardun du Eusko Jaurlaritzako merkataritza-bulego teknikoekin sariak lurralde osoan hedatzeko. Horretarako, golardo “parte-hartzaile eta esanguratsuagoak” sortu dituzte: ’10 bitxiak’. Duela 25 urte jaiotako Kimu Bat lan-sozietateak sari horietako bat eskuratu du, probintziako merkataritza-bulegoek aukeratutako beste bederatzi erakunderekin batera, eskualde bakoitzeko bana. Enpresa horiek guztiak balio azpimarragarriak transmititzen dituztelako eta ospea dutelako saritu dituztela jakinarazi dute.
 
Markel Olano ahaldun nagusiaren presentziarekin bart gauean ospatutako ekitaldian, Kutxabankek eta Euskaltelek babestutako 2016ko Gipuzkoako Merkataritza Enpresaren Saria lortu zuen Croqueta y Presumida-k, “kudeaketa egokiagatik, enplegua sortzeagatik eta ingurunearekin duen konpromisoagatik. Barne kudeaketa prozesuetan ezarritako teknologiak, interneten duten presentzia eta posizionamendua eta inguruko merkataritza dinamizatzeko duten inplikazioa ere aintzat hartu dituzte enpresa saritzeko orduan. 
 
Aurten, Gipuzkoako merkataritzako sektore guztietara zabaldu dira ’10 bitxiak’ sariak. Deba Garaia eskualdekoek Oñatiko Maibi Dekorazioa eta Ehungintza saritu dute. Urola Garaikoek, berriz, Zumarragako Josune janari denda. Debabarrena eskualdekoek Mendaroko Chocolates de Mendaro Saint-Gerons txokolate denda nabarmendu dute, eta Bidasoaldekoek, Irungo ai lof llu Atelier. Donostian Zugasti jantziak izan da garaile eta Donostialdean, aldiz, Hernaniko Ibaimendi Kirolak. Goierri aldean Beasaingo Xalo saritu dute, eta Oarsoaldean Errenteriako Bitxi Kolore hartu dute aintzat. Tolosaldea eskualdekoek Tolosako Guki Ekodenda azpimarratu dute eta Urolakoek, azkenik, Azpeitiko Kimu bat. 
 

Kimu Bat

Paisajismo eta lorezaintza sektorean diharduen Kimu Bat enpresak 25 urte baino gehiago daramatza ingurumenaren alde lanean eta, egun, lan-sozietate gisa antolatuta, herrigintzaren alde elkarlanean dabiltzan 20 pertsona baino gehiagoko lan-taldea osatu du. Enpresaren ‘garden’ berriaren inaugurazioan, pasa den apirilean, “erreferentziazko” enpresa gisa deskribatu zuen Azpeitiko alkate Eneko Etxeberriak, krisi garaian gizarte-ekonomiaren alde apustu egin duelako eta irabazi-asmorik gabe auzolaneko ekimenetan parte hartzen duelako.
 
25. urteurrenaren harira, berritasun garrantzitsuak barneratu ditu Kimu Batek bere instalazioetan. Lorezaintza-zentro berriaz gain, ingurumen eta bioaniztasun gaiak lantzeko espazio didaktikoak sortu dituzte.
Ingurumenarekiko duten arduraren adibide da Kimu Baten bertan eratu dituzten fitoarazketarako putzu mota ezberdinak, hezegune naturalen eredua jarraituz enpresak sortzen dituen hondakin-urak garbitzeko balio dutenak. Bestetik, euri urak biltzeko fitoarazketan oinarrituriko ur putzu naturalizatu bat ere sortu dute. Horrela, Kimu Bateko ziklo hidrikoa ixten dute, 0 hondakin sortzea lortuz eta bertako ureztaketa-beharrak asez. 
 
Halaber, putzuen ondoan, ur-ponpaketako sistema babesteko estalpe landareduna eraiki dute. Etxolatxo hori Fraisoroko, Kabiako eta Ari arkitekturako lagunekin elkarlanean sortu dute, bioeraikuntzako jakintza ezberdinak hedatzeko antolatutako hainbat ikastaro eta auzolanetan. Paisaiarekin eta naturarekin harreman iraunkorragoa lantzeko xedea du ekimen horrek.
Aipatzekoa da, gainera, landare bizikorretan oinarritutako lorategia ere eratu dutela. Horrela, Kimu Bateko instalazioetan bioaniztasuna indartzeaz gain, lorezaintza-eredu jasangarriagoaren inguruan ikasteko eremua ezarri dute.
 
Paisajismoaren eta baratzegintzaren sektorean duen eskarmentu handia konpromiso sozialeko kutsua duten hainbat proiekturen zerbitzura jarri nahi izan du Kimu Batek. Horren erakusle nabarmena da Hernanin duela bi urte abiarazitako Karabeleko ekonekazaritza-etxaldea. Agifes elkartearekin eta Blasenea mintegiarekin elkarlanean bultzatutako etxalde esperimentala aurrendaria da kantauriar isurialdean, nekazaritza ekologikoaren arloan; eta helburu ditu elikadura subiranotasuna, geure baratzeetako biodibertsitatea eta elikadura ekologikoa suspertzea. Gainera, kolektibo berezien gizarteratzea sustatzeko lan egiten da etxalde horretan. Errehabilitazio psikosozialeko programak gauzatzen dituzte bertan buru gaixotasuna duten pertsonek, Agifes elkartearen eskutik, eta Martuteneko kartzelan dauden pertsonek ere laguntzen dute baratze-lanetan Iresgi elkartearen bitartez.
 
Horrez gain,Kutxa Ekogunearen babesarekin, Gipuzkoako baratze-parke guztietara iristen da Furgobaratza, baratzezaintza ekologikoaren inguruko prestakuntza eskaintzeko eta hazi eta landare anitz banatzeko.
 

Compartir esta noticia